Sóknarmaðurinn Sveinn Elías Jónsson skrifaði í dag undir nýjan samning við knattspyrnudeild Þórs á Akureyri. Þetta kemur fram á heimasíðu félagsins.
Sveinn Elías er fyrirliði Þórs en hann gekk í raðir Akureyrarliðsins árið 2008 en hafði fram að því spilað með Leiftri/Dalvík og KA. Hann hefur spilað 203 leiki með Þórsurunum og skorað í þeim 43 mörk.
Sveinn Elías skoraði 2 mörk í 18 leikjum með Þórsurum í Inkasso-deildinni í sumar en Þór hafnaði í þriðja sæti deildarinnar á eftir ÍA og HK. Gregg Ryder er tekinn við þjálfun Þórsliðsins en Lárus Orri Sigurðsson ákvað að stíga til hliðar eftir tímabilið.