Á morgun, 9. desember, verður Tommadagurinn haldinn í Egilshöll þar sem ætlunin er að safna fé til stuðnings Tómasar Inga Tómassonar og fjölskyldu. Meðal þess sem er á dagskrá er styrktarleikur þar sem valinkunnar kempur munu mætast.
Tómas Ingi, sem er yfirþjálfari yngri flokka Fylkis og aðstoðarþjálfari U21-landsliðs Íslands, hefur ekki náð bata eftir að hann fékk gervimjöðm í ársbyrjun 2015, og á þessu ári hefur hann varið yfir 200 dögum inni á spítala. Hann bíður þess nú að komast í aðgerð í Þýskalandi þar sem fjórar aðgerðir hér á landi hafa ekki skilað árangri.
Í meðfylgjandi myndskeiði fer Tómas yfir hvað hefur gengið á og talar opinskátt um hversu erfitt þetta hefur verið, bæði líkamlega og andlega. Fyrst var hann á móti því að koma á fót styrktarverkefni fyrir sig.
„Fyrsta svar var nei. Ég vildi ekki fara út með þetta og fá athygli á þetta. Ég vildi vinna sjálfur í mínum málum. En ég lét til leiðast, kyngdi stoltinu sem þarf stundum að gera. Sérstaklega í þessum aðstæðum. Þetta hefur fengið góða og jákvæða umfjöllun.
Það eru að koma saman strákar sem hafa ekki spilað fótbolta í mörg ár, bara til að gera daginn betri fyrir mig. Ég hlakka mikið til að sjá þá. Maður hefur verið lengi í boltanum og manni finnst að það sé verið að koma til baka til manns og segja: Þú ert ágætur gæi. Það eru allavega allir tilbúnir að koma í þetta verkefni. Maður hefur kannski snert einhverja strengi í gegnum þennan tíma,“ segir Tómas meðal annars í myndskeiðinu.
Þeim sem ekki komast á Tommadaginn en langar að styrkja verkefnið er bent á að hægt er að leggja inn á reikning 528-14-300, kt. 0706694129.