Ferill Hannesar Þórs Halldórssonar landsliðsmarkvarðar í knattspyrnu með Valsmönnum hófst ekki eins og best varð á kosið í kvöld því hann var rekinn af velli í fyrsta leik sínum.
Viðureign Vals og Stjörnunnar í Meistarakeppni KSÍ stendur nú yfir á Hlíðarenda og flautað hefur verið til hálfleiks en staðan er 0:0.
Á lokamínútu fyrri hálfleiks gerði Hannes slæm mistök þegar hann missti boltann frá sér til Þorsteins Más Ragnarssonar Stjörnumanns og braut síðan á honum utan vítateigs. Hannes fékk umsvifalaust rauða spjaldið hjá Vilhjálmi Alvari Þórarinssyni dómara.
Hannes verður því í leikbanni þegar Valur mætir Víkingi í fyrstu umferð PepsiMax-deildar karla föstudaginn 26. apríl.
Anton Ari Einarsson sem hefur varið mark Vals undanfarin ár er kominn inná sem varamaður, fyrir útispilarann Sigurð Egil Lárusson, og það er því nokkuð ljóst að Anton mun verja mark Vals gegn Víkingi í umræddum leik.
Árni Sæberg ljósmyndari mbl.is og Morgunblaðsins var á Hlíðarenda og náði meðfylgjandi myndum af atvikinu.