Knattspyrnumaðurinn Guðmundur Böðvar Guðjónsson, fyrrverandi leikmaður Breiðabliks, liggur nú undir feldi. Lið úr 1. deild og úrvalsdeild karla hafa sett sig í samband við leikmanninn sem sjálfur kveðst ætla að flýta sér hægt. Þetta staðfestir hann í samtali við mbl.is.
„Ég hef fengið spennandi fyrirspurnir en ætla að skoða mín mál í rólegheitum,“ segir Guðmundur, sem er uppalinn Skagamaður. Hann gekk til liðs við Breiðablik frá ÍA, en þar áður hafði hann leikið með Fjölni.
Guðmundur kom við sögu í sex leikjum í Pepsi Max-deildinni og tveimur leikjum í Mjólkurbikarnum í sumar. Miðjumaðurinn reynslumikli er þrítugur að aldri, en hann hefur leikið 97 leiki í efstu deild karla og skorað í þeim þrjú mörk.