Berglind Björg Þorvaldsdóttir og Karólína Lea Vilhjálmsdóttir skoruðu mörk Íslands í 2:0-sigri á Írlandi í vináttuleik í fótbolta á Laugardalsvelli í dag. Bæði mörkin komu í góðum seinni hálfleik eftir rólegan fyrri hálfleik.
Fyrri hálfleikurinn var með rólegasta móti og voru færin fá og langt á milli þeirra. Berglind Björg Þorvaldsdóttir fékk langbesta færi fyrri hálfleiks þegar hún slapp ein inn fyrir en Courtney Brosnan í marki Íra gerði vel í að verja frá henni. Írar voru baráttuglaðir en sköpuðu sér sömuleiðis fá færi og var staðan í hálfleik markalaus.
Ísland byrjaði seinni hálfleikinn af krafti og Sveindís Jane Jónsdóttir slapp ein í gegn snemma í hálfleiknum en hitti boltann illa, ein gegn Brosnan. Í kjölfarið fékk Gunnhildur Yrsa Jónsdóttir gott færi en þá varði Brosnan mjög vel.
Brosnan kom hins vegar engum vörnum við á 54. mínútu þegar Andrea Rán Snæfeld Hauksdóttir átti flotta fyrirgjöf á Berglindi Björgu sem var óvölduð í teignum og skoraði fyrsta markið.
Örstuttu síðar fékk Andrea Rán Snæfeld Hauksdóttir gott færi til að bæta við öðru marki en hún setti boltann yfir af stuttu færi.
Annað markið kom loks á 83. mínútu og það gerði Karólína Lea Vilhjálmsdóttir þegar hún vann boltann á miðjum vallarhelmingi Íra, brunaði að marki, lét vaða við vítateigslínu og boltinn söng í bláhorninu fjær.
Fátt markvert gerðist eftir annað markið og Ísland fagnaði því tveimur sigrum á Írlandi í tveimur tilraunum.