Eva Carneiro fyrrum liðslæknir Chelsea hefur undanfarið verið að undirbúa málsókn gegn Chelsea vegna meintrar ólöglegrar uppsagnar sinnar hjá félaginu en í dag kom í ljós að hún mun einnig sækja José Mourinho knattspyrnustjóra Chelsea, sérstaklega til saka fyrir sinn hlut í málinu.
Samkvæmt frétt Guardian hefur Press Association Sport undir höndum lagalega pappíra sem segja að Mourinho verði í aðskildu máli sóttur til saka í vikunni fyrir sinn hlut.
Það þýðir að Mourinho þarf að mæta fyrir sérstakan atvinnudómstól - nema að til sátta komi.
Málið hófst í ágúst í leik Chelsea gegn Swansea þegar Carneiro fór inn á völlinn til að hlúa að Eden Hazard, sóknarmanni Chelsea sem lá meiddur á vellinum. Mourinho taldi ekkert ama að Hazard sem í kjölfarið þurfti að fara út af vellinum þar hann fékk aðhlynningu frá lækni.
Varð Chelsea-liðið þarf með tveimur mönnum færri í nokkrar sekúndur og það var Mourinho ekki sáttur með. Lét hann því Carneiro heyra það fyrir framan alla á Stamford Bridge, heimavelli Chelsea. Carneiro var ekki aftur hluti af bekkjarsetuliði Chelsea.
Málið bætir aðeins gráu ofan á svart en Mourinho er undir gríðarlegri pressu þessa dagana enda gengur hvorki né rekur hjá Chelsea. Liðið hefur tapað sex leikjum af fyrstu 11 í deildinni og er þetta versta tíð Mourinho sem knattspyrnustjóra fyrr og síðar. Chelsea er ríkjandi Englandsmeistari en er í 15. sæti af 20 í deildinni.