Brasilíumaðurinn Lucas Moura leikmaður Tottenham var í dag útnefndur besti leikmaður ágústmánaðar í ensku úrvalsdeildinni í knattspyrnu.
Moura var mjög öflugur í liði Tottenham sem vann alla þrjá leiki sína í ágúst en hann skoraði þrjú mörk í deildinni og þar af tvö mörk í 3:0-sigri Tottenham á móti Manchester United á Old Trafford.
Javi Gracia knattspyrnustjóri Watford var valinn stjóri mánaðarins en Watford hefur byrjað tímabilið með frábærum hætti. Watford hefur unnið alla fjóra leiki sína í deildinni og trónir á toppi deildarinnar ásamt Liverpool og Chelsea.