Liverpool verður að vinna rest

Graeme Souness, fyrrverandi fyrirliði og knattspyrnustjóri Liverpool, telur að Liverpool þurfi að vinna alla 11 leikina sem það á eftir í ensku úrvalsdeildinni til að vinna Englandsmeistaratitilinn í ár.

Manchester City endurheimti toppsætið í gær með 6:0 sigri á móti Chelsea. City og Liverpool eru jöfn að stigum. Markatala Manchester City er hins vegar mun betri en Liverpool hefur spilað einum leik færra en Manchester-liðið.

„Með þessari ótrúlegu frammistöðu City held ég að Liverpool þurfi að vinna sína leiki sem það á eftir til að vinna titilinn. Eftir smá hikst sýndi Manchester City hvernig það ætlar að enda þetta tímabil,“ sagði Souness á Sky Sports í gær en Liverpool freistar þess að vinna Englandsmeistaratitilinn í fyrsta skipti í 29 ár á meðan Manchester City stefnir á að verja titilinn.

Næsti leikur Liverpool í deildinni er á móti Manchester United á Old Trafford 24. febrúar en City tekur á móti West Ham 27. febrúar.

• Blogga um frétt