Callum Hudson-Odoi, leikmaður Chelsea, hefur verið kallaður inn í enska landsliðið í knattspyrnu fyrir fyrstu leiki liðsins í undankeppni Evrópumótsins 2020.
Hudson-Odoi er 18 ára gamall, en þetta er í fyrsta sinn sem hann er kallaður inn í aðalliðið. Áætlað var að hann yrði í verkefni með U21 árs landsliði Englands, en landsliðsþjálfarinn Gareth Southgate kallaði hann frekar til sín.
Hudson-Odoi hefur spilað 19 leiki með Chelsea á tímabilinu og skorað fimm mörk, en hefur engu að síður ekki verið í byrjunarliðinu í úrvalsdeildinni.
Englendingar hafa orðið fyrir miklum skakkaföllum en Luke Shaw, John Stones, Fabian Delph og Ruben Loftus-Cheek hafa allir þurft að draga sig úr hópnum.
England mætir Tékklandi á föstudag og Svartfjallalandi á mánudag.