Liverpool þarf að styrkja sig

Jamie Carragher, fyrrverandi leikmaður enska knattspyrnufélagsins Liverpool, telur að félagið þurfi að styrkja leikmannahópinn í sumar. Carragher starfar í dag sem sparkspekingur hjá Sky Sports og fylgist því vel með boltanum en Liverpool endaði í öðru sæti ensku úrvalsdeildarinnar með 97 stig, einu stigi minna en Manchester City, sem var að vinna deildina annað árið í röð.

„Ég held að Liverpool vanti varnarmann, góðan bakvörð, sem getur spilað bæði hægri og vinstra megin. Trent Alexander-Arnold og Andy Robertson eru báðir frábærir bakverðir en ef þeir meiðast þá er enginn til þess að hlaupa í skarðið fyrir þá. James Milner og Jordan Henderson hafa leyst þessar stöður í fjarveru þeirra,“ sagði Carragher í samtali við Liverpool Echo.

„Milner og Henderson standa sig alltaf vel, sama í hvaða stöðu þeir eru látnir spila en okkur vantar betri varamenn fyrir bakverðina okkar sem eru alvöru bakverðir. Liverpool vantar líka öflugan sóknarmann sem er á pari við Firmino, Mané og Salah. Við þurfum ekki framherja held ég en að fá annan, svipaðan leikmann og Mané, myndi gera mikið fyrir liðið,“ sagði Carragher ennfremur.

• Blogga um frétt