Armenski knattspyrnumaðurinn Henrikh Mkhitaryan yfirgaf herbúðir Arsenal til að njóta þess að spila fótbolta aftur, en hann gekk í raðir Roma að láni frá Arsenal í síðasta mánuði.
Mkhitaryan kom til Arsenal á síðasta ári frá Manchester United, sem fékk Alexis Sánchez í hans stað, en þeir hafa báðir valdið nokkrum vonbrigðum eftir skiptin. Mkhitaryan skoraði aðeins átta mörk í 39 deildarleikjum með Arsenal.
„Ég verð að njóta þess að spila fótbolta, hvar sem það er. Ég var ekki lengur ánægður á Englandi og þurfti að yfirgefa Arsenal. Kannski passaði ég ekki í enska boltann og þessi skipti voru góð,“ sagði Armeninn á blaðamannafundi hjá landsliði Armeníu.
„Það er ekki skref til baka að fara til Ítalíu. Fótboltinn hérna er virkilega góður og ég þurfti öðruvísi umhverfi,“ bætti hann við.