Frank Lampard knattspyrnustjóri Chelsea er ekki ánægður með Didier Dechamps landsliðsþjálfara heimsmeistara Frakka.
Franski miðjumaðurinn N'Golo Kante er meiddur og verður ekki með Chelsea-liðinu þegar það mætir Newcastle í ensku úrvalsdeildinni á morgun.
Kanté átti að vera í byrjunarliði Frakka í leiknum gegn Íslendingum á Laugardalsvellinum fyrir viku síðan en eftir upphitun var ljóst að hann gæti ekki spilað vegna meiðsla í nára.
En í stað þess að leyfa Kanté að snúa aftur til London og komast í meðferð hjá sjúkraþjálfurum Chelsea var Kanté með Frökkunum í París í vikunni og fylgdist með leik Frakka gegn Tyrkjum af varamannabekknum. Lampard er fúll út í Dechamps og franska knattspyrnusambandið fyrir að meina Kanté að fara.
„Kanté er ekki leikfær. Hann glímir við smá vandamál í náranum sem hann fékk í upphitun fyrir fyrri leik Frakka í undankeppninni,“ sagði Lampard á fréttamannafundi í dag.
„Við fengum hann ekki til baka fyrr en eftir seinni leikinn og nú er hann ekki klár í slaginn á morgun. Eftir fyrri leikinn þar sem hann dró sig út úr liðinu var hann prófaður daginn fyrir leikinn á móti Tyrkjum. Það var þá ljóst að hann gæti ekki spila. Hann sat samt á bekknum í leiknum.“
Sjálfur hefur Deschamps kvartað við Lampard hversu lítið Olivier Giroud hefur fengið að spila með Chelsea en hann hefur samanlagt spilað um 20 mínútur í átta leikjum Chelsea í deildinni. Giroud byrjaði inná í leiknum á móti Íslendingum og skoraði sigurmarkið úr vítaspyrnu og hann kom inná í leiknum á móti Tyrkjum og skoraði mark Frakka í 1:1 jafntefli liðanna.