Tyrkneski framherjinn Cenk Tosun verður væntanlega ekki með landsliði þjóðar sinnar á EM í fótbolta í sumar vegna hnémeiðsla sem hann varð fyrir á æfingu með Crystal Palace í vikunni.
Tosun var lánaður til Palace frá Everton í janúar, þar sem hann vildi komast í gott leikform fyrir EM í sumar, en hann fékk lítið að spreyta sig hjá Everton á leiktíðinni.
Tyrkneski miðillinn TRT greinir frá því í dag að Tosun verði frá keppni í um sex mánuði. Hann missir því af því sem eftir lifir af tímabilinu á Englandi og EM í sumar.
Sóknarmaðurinn skoraði eitt mark í fimm leikjum með Palace. Hann skoraði aðeins níu mörk í 44 leikjum fyrir Everton eftir að liðið keypti hann frá Besiktas á 27 milljónir punda fyrir tveimur árum. Þá hefur hann skorað 16 mörk í 40 landsleikjum með Tyrklandi.