Leikjum í ensku úrvalsdeildinni í knattspyrnu verður ekki frestað, síðustu umferðum deildarinnar verður ekki aflýst, en í staðinn verður leikið án áhorfenda til vorsins.
The Times segir í frétt sem birtist nú upp úr miðnættinu að þessar áætlanir séu í bígerð og gætu verið kynntar strax með morgni sem hluti af aðgerðum til að halda kórónuveirunni í skefjum á Bretlandseyjum.
Reiknað sé með að breska ríkisstjórnin muni lýsa yfir hæsta viðbúnaðarstigi í landinu vegna veirunnar og um leið og það verði gert verði nýja aðgerðaráætlunin fyrir fótboltann kynnt.
Leikir í öllum deildum verði leiknir án áhorfenda og öllum ársmiðahöfum í úrvalsdeildinni verði gert kleift að streyma leikjunum heiman frá sér.