Paul Pogba, miðjumaður enska knattspyrnufélagsins Manchester United, virðist hafa tekið skyndilega U-beygju en Daily Mirror greinir frá því í dag að hann og forráðamenn félagsins eigi í viðræðum um hvort Frakkinn framlengi samning sinn við liðið eða ekki.
Pogba er samningsbundinn United til ársins 2021 en hann reyndi að komast frá félaginu síðasta sumar og hefur verið mikið meiddur í vetur. Fjölmiðlar hafa talið hann vera á förum undanfarna mánuði og þá hefur umboðsmaður hans, Mino Raiola, átt í orðaskaki við Ed Woodward, framkvæmdastjóra United. Þeir eru hins vegar búnir að ná sáttum og stendur nú til að setjast niður með Frakkanum og ræða framtíð hans hjá félaginu.
Hann hefur aðeins byrjað fimm leiki í ensku úrvalsdeildinni þar sem hann hefur lagt upp tvö mörk. Pogba á að baki 150 leiki fyrir United í öllum keppnum þar sem hann hefur skorað 31 mark en Juventus og Real Madrid eru bæði sögð áhugasöm um leikmanninn.