Knattspyrnumaðurinn Wayne Rooney segir að Louis van Gaal hafi verið rekinn of fljótt frá Manchester United árið 2016 en Hollendingurinn hafði þá stýrt félaginu í tvö ár og unnið enska bikarinn.
United hafnaði í fjórða sæti eftir fyrsta tímabil van Gaal en tókst ekki að tryggja sér sæti í Meistaradeild Evrópu ár síðar. Hollendingurinn var í kjölfarið látinn fara þrátt fyrir að hafa stýrt liðinu til sigurs í ensku bikarkeppninni. United hefur aðeins einu sinni tekist að hafna í einum af fjórum efstu sætunum þau fjögur tímabil síðan Hollendingurinn var látinn fara.
„Ég var niðurbrotinn þegar Louis var rekinn, það var frábært að vinna með honum,“ skrifar Rooney í vikulegan pistil sinn í Sunday Mirror, en hann var gerður að fyrirliða United undir stjórn van Gaal.
„Við hefðum átt að halda honum út þriðja tímabilið, við hefðum verið miklu sterkara lið þannig. Ég fann hvernig við vorum að verða betri, leikmenn voru farnir að skilja hugmyndafræði hans. Hann kenndi mér meira en nokkur annar stjóri. Ég verð honum alltaf þakklátur.“
Van Gaal sjálfur hefur gagnrýnt forráðamenn United harðlega fyrir að hafa rekið hann of snemma en þar eru þó ekki allir á sama máli. Mark Ogden á ESPN segir van Gaal aðeins geta kennt sjálfum sér um endalokin hjá United.
„Hann hefur alltaf verið mjög bitur yfir endinum hjá United. En það var vitað að hann yrði rekinn því úrslitin voru ekki nægilega góð. Hann kennir Woodward um en hann getur aðeins sjálfum sér um kennt.
Það eina sem Ed Woodward gerði rangt var að leyfa van Gaal að kaupa leikmenn eins og Memphis Depay, Bastian Schweinsteiger, Matteo Darmian, Marcos Rojo, Angel Di María og fleiri. Leikmannakaupin hans voru hræðileg, fótboltinn ömurlegur og úrslitin slæm,“ sagði Ogden.