Manchester United á ekki að vera eltast við knattspyrnumanninn Philippe Coutinho og þarf ekki á honum að halda en þessi fyrrverandi leikmaður Liverpool er á sölulistanum hjá Barcelona. Þýska félagið Bayern München leyfði kauprétti sínum á leikmanninum að renna út en hann er þar á láni út þetta tímabil.
Dimitar Berbatov, sem spilaði með United um árabil, telur sitt gamla lið einfaldlega hafa nóg af góðum miðjumönnum og þurfi því ekki kappann. „Hann mun fara í gott lið, enda góður leikmaður en í hreinskilni sagt, United þarf hann ekki,“ sagði Berbatov í myndskeiði sem Betfair birti á samfélagsmiðlum sínum um þær sögusagnir að Brasilíumaðurinn gæti skipt til Manchester.
Umboðsmaður Coutinho hefur sagt að leikmaðurinn vill fara aftur til Englands þar sem hann átti frábær ár með Liverpool en hann er 27 ára gamall. Barcelona borgaði 105 milljónir punda fyrir brasilíska sóknarmanninn sem er nú sagður vera til sölu fyrir 70 milljónir punda. Hann er eftirsóttur af liðum í ensku úrvalsdeildinni og þá hefur hann einnig verið orðaður við Frakklandsmeistara PSG.