Jürgen Klopp og lærisveinar hans í Liverpool voru til umræðu í þættinum Völlurinn á Síminn Sport þar sem þeir Bjarni Þór Viðarsson og Freyr Alexandersson voru gestir Tómasar Þórs Þórðarsonar.
Liverpool hefur nú þegar tryggt sér Englandsmeistaratitilinn en það þýðir ekki að leikmenn og þjálfarar liðsins hafi efni á því að slaka á. „Nú þarf þjálfarateymið að stíga upp, setja ný markmið til að elta og ýta á leikmenn á æfingasvæði og í leikjum,“ sagði Freyr.
„Þeir eru 100% að elta þetta stigamet líka,“ bætti Bjarni við en Liverpool er með 92 stig eftir 34 leiki og getur því endað tímabilið með 104 stig, takist liðinu að vinna rest. Metið á Manchester City sem nældi í 100 stig fyrir tveimur árum. Umræðuna má sjá í spilaranum hér að ofan.