Íþróttir | Enski boltinn | mbl | 9.11.2022 | 22:09 | Uppfært 23:26

City vann stórslaginn – Liverpool skreið áfram gegn Derby

Ruben Dias og Armando Broja eigast við í kvöld. AFP/Linsey Parnaby

Manchester City er komið áfram í 16-liða úrslit enska deildabikarsins í fótbolta eftir 2:0-sigur á Chelsea í stórleik 3. umferðarinnar í Manchester í kvöld.

Eftir markalausan fyrri hálfleik skoruðu Riyad Mahrez og Julián Álvarez mörk City-manna með skömmu millibili snemma í seinni hálfleik.

Liverpool þurfti að hafa töluvert fyrir því að leggja C-deildarlið Derby að velli á Anfield. Staðan eftir venjulegan leiktíma var markalaus og í deildabikarnum er farið beint í vítakeppni. Þar skoraði Liverpool úr þremur spyrnum og Derby úr tveimur. Caomin Kelleher markvörður Liverpool var hetja sinna manna því hann varði þrjár vítaspyrnur.

Liverpool rétt marði Derby. AFP/Oli Scarff

Newcastle er komið áfram eftir sigur á Crystal Palace í vítakeppni. Var staðan eftir venjulegan leiktíma 0:0, en Newcastle reyndist sterkara liðið í vítakeppni og vann 3:2.

Blackburn úr B-deildinni sló úrvalsdeildarlið West Ham óvænt úr leik með 10:9-sigri í vítakeppni. Staðan eftir venjulegan leiktíma var 1:1. Jack Vale skoraði mark Blackburn og Pablo Fornals mark West Ham.

Loks vann Southampton úr úrvalsdeildinni nauman sigur á Sheffield Wednesday úr C-deildinni. Josh Windass kom Sheffield Wednesday yfir á 24. mínútu, en James Ward-Prowse jafnaði úr víti í lok fyrri hálfleiks. Reyndust það einu mörk leiksins og réðust úrslitin því í vítakeppni, þar sem Southampton var sterkara.