Viktor Þór í mótlæti í Spa
Setja bókamerki
Viktor Þór Jensen átti við mótlæti að stríða er keppt var í bresku formúlu-3 mótaröðinni í hinni frægu braut Spa-Francorchamps í Ardennafjöllum í Belgíu um helgina.
Þótt svæðið sé kunnugt fyrir græðandi heitar keldur var keppnin svekkjandi barátta fyrir Viktor Þór sem tókst á við vandamál sem hann fékk ekki stjórnað.
Helgin byrjaði vel er hann var lengst af í öðru sæti á fyrstu æfingu og þriðji að lokum. Á því gat Viktor ekki byggt vegna tæknibilunar í bílnum sem kom í veg fyrir að hann skilaði vélgögnum sem nauðsynleg eru til að fínstilla uppsetningar og vængi.
Fyrir vikið var allt mat á eigin frammistöðu og bílsins eins og að renna blint í sjó. Háði þessi vandi honum alla helgina. Fyrri kappaksturinn lagði hann af stað í sjötta sæti í breska þjóðarflokknum. Á fyrsta hring spretti hann úr spori sem fyrr og vann sig upp í annað sætið í flokknum og tekið einnig fram úr mörgum bílum í alþjóðlega flokknum.
Viktor Þór skorti hins vegar bílhraða til að halda fengnum hlut og varð að sætta sig við sjötta sætið að lokum.
Fyrir seinni kappaksturinn varð hann aftur sjötti í tímatökum. Væntingar hans jukust er hann tók að rigna skömmu fyrir ræsingu því þar með stóð hann jafnfætis öðrum keppendum hvað uppsetningu bílsins varðaði. Þá hafði hann staðið sig vel í rigningarkeppni í Búkarest og því til alls líklegur.
Vel horfði í ræsingunni sem verið hefur sterka hlið Viktors Þór og varð engin breyting þar á nú. Tók hann fram úr a.m.k. þremur bílum á upphafskaflanum. Til allrar óhamingju varð hann hins vegar fyrir því að ógætinn ökuþór hafði ekki vald á bíl sínum í bleytunni í fyrstu beygju og keyrði inn í Viktor Þór.
Framfjöðrun brotnaði og eftir að hafa komið bílnum inn í bílskúr varð Viktor Þór að láta sér nægja að horfa á eftirleikinn. Bílarnir óku á eftir öryggisbíl í þrjá hringi og var þá keppni hætt vegna aðstæðna. Þar með missti hann af gullnu tækifæri til að komast á verðlaunapall. Og með því að falla úr leik gerðist það í fyrsta sinn á árinu að Viktor Þór vinnur ekki stig í móti. Var hann eini ökuþór formúlu-3 sem unnið hafði stig í hverju móti.
Á heimasíðu sinni segir Viktor Þór um gang mála um helgina: „Auðvitað var ég svekktur á stundum þar sem ekki var hægt að ráða bót á vandanum. En ég er samt staðráðinn í að standa mig og átti langt og gagnmerkt samtal við liðsstjórann Alan Docking á heimleiðinni frá Spa. Liðið hefur getið af sér meistara og ég veit að við getum það aftur.
Maður verður að horfa fram á veginn og útilokað er annað en að hlakka til þess að Silverstone er næst á dagskrá. Mikilvægast er að komast fyrir vandann sem hrjáði okkur og verða öflugir.“
„Höfum ekki náð að skríða upp úr þeirri gryfju“
„Það þarf að vinna mikinn fjölda upp“
Telur forsendur fyrir vaxtalækkun
„Hvílir mikil leynd yfir þessu öllu“
Handteknir eftir myndatöku í Vesturbæjarlaug
Krefjast stöðvunar framkvæmda
Skiptir miklu meira máli en fólk grunar