Feðgar á ferð í Mónakó

Feðgarnir Keke og Nico Rosberg óku meistarabílum sínum í kappakstursbrautinni í Mónakó í gær, að lokinni fyrstu æfingu dagsins.

Segja má að áhorfendur hafi með þessu fengið ánægjulegan bónus. Keke ók Williams FW08 bílnum sem hann vann heimsmeistaratitil ökumanna á árið 1982.

Nico átti að sama skapi endurfundi við Mercedes W07 bílinn sem hann ók til sigurs í titilslagnum 2016.

Keke Rosberg ók á undan syni sínum fyrri hringinn en síðan tók Nico fram úr er þeir komu út úr undirgöngunum. Læsti hann báðum framdekkjum á bremsusvæðinu með tilheyrand reyk er gúmmíið ofhitnaði.

Keke og Nico Rosberg eru einu feðgarnir sem farið hafa með sigur af hólmi í kappakstrinum í Mónakó. Sá fyrrnefndi hrósaði sigri þar árið 1983, einnig á Williamsbíl,  Fw08C. 

Nico Rosberg, sem ólst upp í Mónakó, hrósaði sigri á götum dvergríkisins þrjú ár í röð, 2013 til 2015, í öll skiptin á Mercedes.

Feðgarnir nutu augnabliksins í Mónakó í gær og vi það tækifæri voru meðfylgjandi myndir teknar.

• Blogga um frétt