Barcelona tryggði sér í kvöld sæti í 8-liða úrslitum Meistaradeildar Evrópu í knattspyrnu eftir öruggan 3:0 sigur á Chelsea. Börsungar unnu einvígið samtals 4:1.
Barcelona setti tóninn strax í upphafi, bókstaflega, því eftir tvær mínútur og átta sekúndur skoraði Lionel Messi fyrsta mark leiksins þegar hann kláraði afar þröngt færi framhjá Thibaut Courtois í marki Chelsea. Þetta var fljótasta mark sem Messi hefur skorað á ferlinum.
Chelsea sótti mikið eftir þetta en var refsað með skyndisókn á 20. mínútu. Ousmane Dembele, ungstirnið sem leysti Neymar af hólmi, skoraði þá með þrumuskoti upp í þaknetið. Marcos Alonso átti tilraun úr aukaspyrnu í stöngina undir lok fyrri hálfleiks, en staðan að honum loknum var 2:0.
Chelsea-menn komu dýrvitlausir til leiks eftir hlé og sóttu stíft án þess þó að ná að setja mark sitt á leikinn. Það var svo fyrrnefndur Messi sem gerði endanlega út um leikinn á 63. mínútu. Hann sýndi þá snilli sína enn einu sinni úr þröngu færi og kom Barcelona í 3:0.
Einvíginu var lokið eftir þetta og mörkin urðu ekki fleiri. Barcelona er því komið í 8-liða úrslitin samanlagt 4:1 en Chelsea er úr leik.