Spánn vann nauman heimasigur á Noregi, 2:1, í undankeppni Evrópumóts karla í knattspyrnu í Valencia í kvöld en liðin leika í F-riðli. Þá unnu Bosnía, Ítalía og Grikklandi leikina þrjá í J-riðlinum.
Helgi Kolviðsson stýrði Liectenstein í fyrsta sinn er liðið tapaði 2:0 á heimavelli gegn Grikklandi en Kostas Fortounis og Anastasios Donis skoruðu mörk Grikkja. Með Helga í þjálfarateyminu eru markmannsþjálfarinn Guðmundur Hreiðarsson og styrktarþjálfarinn Sebastian Boxleitner en báðir voru í þjálfarateymi íslenska landsliðsins en hættu þegar Svíinn Erik Hamrén tók við þjálfun landsliðsins af Heimi Hallgrímssyni.
Helgi var í desember ráðinn landsliðsþjálfari Liectenstein til tveggja ára en hann var aðstoðarþjálfari íslenska karlalandsliðsins í tvö ár frá 2016-2018. Á þriðjudaginn sækja lærisveinar Helga Ítali heim.
Fyrstu þrír leikirnir í J-riðli fóru svo allir fram í kvöld. Ítalía vann þægilegan 2:0-heimasigur á Finnlandi þar sem Nicolo Barella og Moise Kean skoruðu mörkin. Bosnía vann 2:1-heimasigur á Armeníu.
Norðmenn, sem eru þjálfaðir af Lars Lagerbäck, lentu undir strax á 16. mínútu þegar Rodrigo kom heimamönnum yfir en gestirnir virtust eiga möguleika á stigi þegar Joshua King jafnaði metin af vítapunktinum eftir rúmlega klukkutíma leik.
Spænski fyrirliðinn Sergio Ramos kom þó sínum mönnum til bjargar eins og svo oft áður með sigurmarki á 71. mínútu, einnig af vítapunktinum. Spánverjara hafa því, eins og Svíþjóð og Malta, unnið fyrsta leikinn í undankeppninni. Á botninum sitja Færeyjar, Noregur og Rúmenía.