Brasilíumaðurinn Neymar var einn af fimm leikmönnum sem voru reknir af velli undir lok leiks París SG og Marseille í frönsku 1. deildinni í knattspyrnu í kvöld.
Dómari leiksins sýndi Neymar rauða spjaldið eftir að hafa skoðað myndband af atviki þar sem Brasilíumaðurinn sló andstæðing. Á leið sinni af velli sagði Neymar við fjórða dómara leiksins að hann hefði heyrt rasísk ummæli í sinn garð.
Alls voru gulu og rauðu spjöldin sýnd 17 sinnum sem er met í franska fótboltanum á þessari öld. Auk Neymars fengu samherjar hans Layvin Kurzawa og Leandro Paredes rauða spjaldið, sem og Jordan Amavi og Dario Benedetto, leikmenn Marseille.
PSG tapaði leiknum á heimavelli, 0:1, þar sem Florian Thauvin skoraði eftir hálftíma fyrir Marseille. Þar með hefur stjörnum prýtt meistaraliðið tapað tveimur fyrstu leikjum sínum á tímabillinu og það hefur ekki gerst hjá félaginu frá haustinu 1984.