Áströlskum Ólympíuförum mun standa til boða að pakka niður extra sterkum smokkum áður en lagt verður í hann til Brasilíu þar sem Ólympíuleikarnir fara fram í sumar. Ástæðan mun vera sú að koma í veg fyrir smit á zika-veirunni. Áströlsk yfirvöld greindu frá þessu fyrr í dag.
Brasilía hefur verið í sviðsljósinu vegna zika-veirunnar sem greindist þar í landi í maí í fyrra. Zika-veiran berst með moskítóflugum og smitast á milli manna þegar flugurnar sjúga blóð. Helstu einkenni sýkingarinnar eru hiti, útbrot, tárubólga og vöðvaverkir. Einkenni koma yfirleitt fram 2-7 dögum eftir bit og standa yfir í 2-7 daga.
Læknar í Brasilíu telja nú að zika-veiran sé enn hættulegri en talið var í fyrstu. Tengsl gætu verið á mikill sjúkdómsins og galla í taugakerfi og það gæti haft áhrif á börn allt að fimmtungs þungaðra kvenna. Bóluefni gegn veirunni er enn ekki komið fram.
Smokkar verða fáanlegir í sjálfsölum í Ólympíuþorpinu, en áströlsk yfirvöld kjósa að taka enga óþarfa sénsa og vilja sjá keppnisfólki sínu fyrir auka öryggi, þó að ekki sé nema til að róa huga þess. „Heilsa og velferð Ólympíuliðsins skiptir öllu máli,“ segir Kitty Chiller, fararstjóri ástralska Ólympíuhópsins.
Fyrirtækið Starpharma framleiðir extra sterku smokkana sem Ólympíufararnir munu taka með sér, og að sögn talsmanns fyrirtækisins innihalda smokkarnir sleipiefni sem minnkar líkur á kynsjúkdómasmiti og öðru smiti.
Alþjóðaheilbrigðisstofnunin (WHO) hefur ráðlagt ófrískum konum að ferðast ekki til Rio de Janeiro og hefur brýnt fyrir íþróttadólki og ferðamönnum að gera ráðstafanir til að forðast smit.