Tiger Woods og Phil Mickelson eru báðir á 156 manna lista yfir þátttakendur á PGA meistaramótinu í golfi sem fram fer í Oklahoma í Bandaríkjunum.
Woods sneri aftur á golfvöllinn á Masters-mótinu í síðasta mánuði, 14 mánuðum eftir að hann lenti í alvarlegu bílslysi.
Mickelson vann mótið í fyrra og varð þar með elstur í sögunni til að vinna risamót í golfi, 51 árs gamall. Hann hefur verið í fríi frá golfi síðan í febrúar sem varð til þess að hann missti af Masters-mótinu í fyrsta sinn í 28 ár.
Efsti maður heimslistans og sigurvegari Masters-mótsins í síðasta mánuði, Scottie Scheffler, Rory McIlroy, Justin Thomas, Brooks Koepka og Collin Morikawa eru einnig allir skráðir til leiks á mótið.