Snúinn riðill bíður íslenska liðsins

Helena Rut Örvarsdóttir, Þórey Rósa Stefánsdóttir landsliðskonur í handknattleik.
Helena Rut Örvarsdóttir, Þórey Rósa Stefánsdóttir landsliðskonur í handknattleik. mbl.is/Árni Sæberg

Íslenska landsliðið í handknattleik kvenna á fyrir höndum erfiða leiki í forkeppni heimsmeistaramótsins á næsta vetri en dregið var í riðla á þingi Handknattleikssambands Evrópu, EHF, í Glasgow í morgun. 

Íslenska liðið var í öðrum styrkleikaflokki og dróst í riðil með landsliðum Tyrklands, Makedóníu og Aserbadsjan. Ekki er ljóst enn hvar undankeppnin fer fram né nákvæmlega hvenær en reikna má með að leikið verði í síðla í nóvember eða í byrjun desember.

Dregið var í fjóra riðla. Sigurlið hvers riðils auk þess liðs sem nær bestum árangri í öðru sæti kemst í umspil um sæti á HM.Umspilsleikirnir fara fram eftir ár. Lokakeppni HM fer fram í Kumamoto í Japan frá 29.nóvember til 15. desember 2019.

mbl.is