Ragnar Jóhannsson skoraði fimm mörk og var einn þriggja markahæstu leikmanna Hüttenberg þegar liðið vann sterkan sigur á Ferndorf, 26:25, í þýsku 2. deildinni í handbolta í kvöld.
Ferndorf er í 3. sæti deildarinnar en Hüttenberg er um miðja deild, eftir sigurinn í 11. sæti með 11 stig úr 12 leikjum.
Oddur Gretarsson skoraði eitt marka Balingen sem vann Dormagen á útivelli, 27:25, og jafnaði þar með Ferndorf að stigum í 3.-4. sæti. Liðin hafa 17 stig, tveimur stigum minna en Coburg og Essen sem eru efst.
Sigtryggur Daði Rúnarsson var ekki á meðal markaskorara Lübeck-Schwartau sem tapaði 27:23 fyrir Wilhelmshavener á útivelli. Lübeck-Schwartau er í 8. sæti með 14 stig.
Hamburg saknar enn Arons Rafns Eðvarðssonar sem er frá keppni eftir að hafa fengið botnlangabólgu. Liðið tapaði fyrir Emsdetten á útivelli, 30:29, og er í 10. sæti með 12 stig.