Harpa bætist í hópinn og Perla tekur slaginn

Harpa Valey Gylfadóttir hefur skrifað undir þriggja ára samning við handknattleiksdeild Selfoss og leikur því með liðinu í næstefstu deild á komandi tímabili.

Harpa Valey gengur til liðs við Selfoss frá ÍBV þar sem hún hefur leikið allan sinn feril, en flytur nú upp á fasta landið.

Hún hefur verið lykilleikmaður í liði ÍBV undanfarin ár og skoraði 71 mark í 25 leikjum fyrir liðið á síðasta tímabili þegar ÍBV varð bæði deildar- og bikarmeistari. Þá hefur hún einnig leikið með öllum yngri landsliðum Íslands sem og A-landsliðinu.

„Það er okkur mikið gleðiefni að þær stelpur sem höfðu tækifæri til að leika í efstu deild á næsta tímabili ætli að halda tryggð við klúbbinn og þessi viðbót mun bara styrkja okkar þegar sterka hóp,“ sagði Eyþór Lárusson, þjálfari liðsins, í tilkynningu frá handknattleiksdeild Selfoss.

Í tilkynningunni var koma Perlu Ruthar Albertsdóttur til uppeldisfélagsins frá Fram um leið staðfest, en greint hafði verið frá því í febrúar síðastliðnum að hún myndi söðla um.

Frétt af mbl.is

Snýr heim eftir fjögurra ára fjarveru

Einnig hafði verið tilkynnt um komu Lenu Margrétar Valdimarsdóttur til Selfoss frá Stjörnunni en hún vatt kvæði sínu í kross þegar ljóst varð að liðið væri fallið niður í 1. deild og samdi við uppeldisfélag sitt Fram í dag.

Frétt af mbl.is

Hætti við þegar liðið féll og fór í Fram

Er með stórt Selfoss hjarta

Perla Ruth snýr hins vegar aftur í Selfoss, þar sem hún er búsett, eftir gæfurík ár hjá Fram þar sem hún vann til fjölda titla og var reglulega í íslenska landsliðshópnum. Hún er einn af leikja- og markahæstu leikmönnum Selfoss frá upphafi með 457 mörk í 137 leikjum.

„Ég er með stórt Selfoss hjarta og er því spennt að taka slaginn með uppeldisfélaginu í þessu mikilvæga verkefni sem er fram undan. Selfoss er með mikinn metnað, frábæra umgjörð, efnilegan leikmannahóp og gríðarlega spennandi þjálfarateymi.

Við ætlum okkur beina leið aftur upp í Olísdeildina og stefnum á að festa liðið í sessi sem eitt af betri liðum landsins á skömmum tíma.

Það er margt spennandi og skemmtilegt fram undan í klúbbnum og er ég virkilega spennt að spila aftur fyrir framan frábæru stuðningsmennina á Selfossi,“ sagði Perla Ruth í tilkynningunni.

• Blogga um frétt