Kári fingurbrotinn

Kári Jónsson.
Kári Jónsson. mbl.is/Styrmir Kári

Kári Jónsson, einn af lykilmönnum Hauka sem tróna á toppi Dominos-deildar karla í körfuknattleik, fingurbrotnaði á æfingu með íslenska landsliðinu og ljóst er að hann verður frá keppni næstu vikurnar.

„Þetta gerðist á landsliðsæfingunni í fyrradag og við myndatöku í gær kom í ljós smá brot í þumalfingrinum á hægri hendinni,“ sagði Kári í samtali við mbl.is en hann hefur spilað virkilega vel með liði Haukanna, sem hafa tveggja stiga forskot á ÍR-inga þegar þrjár umferðir eru eftir af deildarkeppninni.

„Það er ennþá verið að skoða þetta aðeins betur en ég gæti verið frá keppni í um fjórar vikur. Það þýðir að ég missi af þremur síðustu leikjunum í deildinni en stefnan er að reyna að ná fyrsta leiknum í úrslitakeppninni,“ sagði Kári við mbl.is.

Þetta er mikið áfall fyrir Haukana sem eru í harðri baráttu um deildarmeistaratitilinn. Kári hefur í stóru hlutverki með Hafnarfjarðarliðinu og hefur skorað að meðaltali 19,8 stig í leik, tekið 4,5 fráköst og átt 5,1 stoðsendingu.

Kári var valinn í landsliðshópinn fyrir leikina gegn Finnum og Tékkum í undankeppni HM sem fram fara í Laugardalshöllinni um komandi helgi. Nú er ljóst að hann verður fjarri góðu gamni í þeim leikjum sem og næstu leikjum Haukanna.

mbl.is