Keilukeppni Reykjavíkurleikanna fer fram í Egilshöll næstu daga. Spiluð verður forkeppni í fimm riðlum fram á laugardag en á sunnudag verður keppt til úrslita með útsláttarfyrirkomulagi. 34 erlendir keppendur frá sex löndum taka þátt í mótinu, meðal annars þrjár atvinnukonur í keilu og sigurvegarinn frá því í fyrra, Jesper Agerbo frá Danmörku.
Í dag voru spilaðir fyrstu tveir riðlar mótsins og er Mattias Möller frá Svíþjóð efstur eftir daginn, Gunnar Þór Ásgeirsson úr ÍR í öðru sæti og Jesper Agerbo frá Danmörku í þriðja sæti.
Tveir keppendur náðu að spila fullkominn leik í dag eða 300 pinna. Arnar Davíð Jónsson sem spilar með Höganas Svíþjóð setti í einn 300 leik strax í öðrum leik dagsins. Hann var svo í harðri keppni í 6. og síðasta leik riðilsins við félaga sinn Svíann Mattias Möller en þeir felldu báðir inn í 10. ramma. Arnari mistókst að ná öðrum 300 leik dagsins en lék engu að síður 297 á meðan Möller náði að klára og tók þar með annan 300 leik dagsins.
Úrslit og nánari upplýsingar um keilukeppni Reykjavíkurleikanna má finna hér.