Pítsukeðjan Pizzan, næststærsta flatbökukeðja á landinu, hefur lokað veitingastað sínum á Reykjavíkurvegi í Hafnarfirði. Ólafur Friðrik Ólafsson, eigandi Pizzunnar, segir í samtali við Morgunblaðið að lengi hafi staðið til að loka staðnum. Hann hafi verið orðinn gamall og lúinn, auk þess sem búðin hafi verið lítil og óhentug.
„Eftir að við opnuðum nýjan veitingastað Pizzunnar við Litlatún í Garðabæ í fyrra var engin skynsemi í að vera með stað jafn stutt í burtu og Pizzan á Reykjavíkurvegi var,“ segir Ólafur og bætir við að það hafi alltaf verið stefnan að komast aftur í Garðabæinn.
Fyrsti veitingastaður Pizzunnar var einmitt opnaður í Smiðsbúð í Garðabænum árið 1998, en honum var síðar lokað. „Nýi staðurinn í Garðabænum hefur gengið vel,“ segir Ólafur.
Hann segir að salan hafi almennt gengið vel hjá Pizzunni í ár. „Fólk hefur ekki látið Covid stoppa sig í að fá sér pítsu.“
Eftir lokunina á Reykjavíkurvegi rekur Pizzan átta veitingastaði. Þeir eru auk staðarins í Garðabæ við Strandgötu í Hafnarfirði, í Núpalind í Kópavogi, í Hverafold, við Hringbraut, í Fellsmúla og í Lóuhólum í Reykjavík, ásamt Pizzunni á Glerártorgi á Akureyri.
Nánari umfjöllun er að finna í Morgunblaðinu sem kom út þriðjudaginn 7. desember.