Unnið til baka flesta markaði

„Okkur hefur tekist að vinna til baka flesta þá markaði sem við gátum ekki þjónustað sem skyldi meðan á sjómannaverkfallinu stóð fyrir tæpu ári,“ segir Helgi Anton Eiríksson, forstjóri Iceland Seafood International.

„Á meðan íslensk sjávarútvegsfyrirtæki gátu ekki selt ferskan fisk brugðu keppinautar á það ráð að þíða heilan frosinn fisk og selja sem kældan. Eftir þau viðskipti eru einhverjir stórir fiskkaupendur reiðubúnir til þess að bjóða aftur upp á uppþíddan kældan fisk ef þeim þykir verð á ferskum hágæðafiski of hátt. Varan er ekki jafn góð en viðskiptavinir eru nokkuð sáttir. Fram að verkfalli var lítið um slíkan fisk nema í Bretlandi. Við upplifðum þetta verulega í fyrra,“ segir hann.

Ítarlegra samtal við Helga Anton má finna í ViðskiptaMogganum sem fylgdi Morgunblaðinu í gær, fimmtudag.