Eldur kom upp í bát á Vestfjörðum

Þyrla Landhelgisgæslunnar, TF-GNÁ, og björgunarskip frá Patreksfirði voru kölluð út á ellefta tímanum í morgun vegna elds í bát sem var staddur úti fyrir Tálknafirði. Tveir voru um borð í bátnum. Þá voru nærliggjandi skip einnig beðin um að halda á staðinn.

Björgunarskipið Vörður frá Tálknafirði kom ásamt öðru skipi fyrst á staðinn um hálf ellefu. Áhafnir skipanna tveggja hófu björgunaraðgerðir en mennirnir um borð í bátnum voru heilir á húfi og því var aðstoð þyrlunnar afturkölluð.

Davíð Rúnar Gunnarsson slökkviliðsstjóri á Patreksfirði segir slökkvistarfi ekki að fullu lokið, en Björgunarskipið Vörður er nú að draga bátinn til hafnar á Patreksfirði.

Hann segir mennina sem um borð voru hafa sýnt hárrétt viðbrögð við eldinum. „Þeir lokuðu strax niður og á öll op og kölluðu á eftir aðstoð,“ segir hann. Áhafnir skipanna sem að komu hófu síðan slökkvistarf og héldu því áfram þar til frekari aðstoð barst.

Eldsupptök eru enn ókunn.

• Blogga um frétt