Stórfelldar breytingar verða gerðar á siglingaleiðum Samskipa í október. Í stað tveggja leiða verður nú siglt á þremur þar sem tvær, Norðurleið og Suðurleið, fara til Evrópu og ein, Strandleið, þjónar millilandaflutningum frá höfnum á Norður- og Austurlandi um Færeyjar til Evrópu. Við þessar breytingar bætist eitt skip í flotann.
Í tilkynningu frá Samskipum segir að með nýju og breyttu siglingakerfi sé verið að koma til móts við þarfir viðskiptavina sinna sem kalla á styttri flutningstíma, aukinn áreiðanleika og aukna tíðni ferða. „Fyrir innflutning er þjónustan sniðin að því að afhenda vörur á Íslandi snemma í vikunni. Fyrir útflutning er boðið upp á afhendingar í upphafi viku á lykilmarkaði í Evrópu. Þá er þjónusta við landsbyggðina efld til muna með vikulegum viðkomum á Vestfjörðum, Norður- og Austurlandi,“ segir í tilkynningu.
Norðurleið er sniðin að þörfum þeirra sem flytja út vörur til meginlandsins og þeirra sem flytja inn vörur frá Skandinavíu, jafnframt því að þjóna Færeyjum.
Suðurleið er sniðin að þörfum viðskiptavina sem flytja vörur til og frá Bretlandi og að innflutningi frá meginlandinu. Suðurleið tengir jafnframt Vestfirði beint inn á Bretland og meginlandið með vikulegum viðkomum á Bíldudal, sem er ný höfn í siglingakerfi Samskipa. Strandleið tengir svo viðkomuhafnir á Norður- og Austurlandi inn á Norðurleiðina í Færeyjum í viku hverri.
„Nýja siglingaáætlunin færir viðskiptavinum okkar margvíslegan ávinning,“ er haft eftir Pálmari Óla Magnússyni, forstjóra Samskipa á Íslandi, í tilkynningu.
Með breytingunum segir Pálmar Samskip jafnframt svara kalli viðskiptavina sinna og geti nú afhent innflutningsvöru degi fyrr en áður í Reykjavík, sem sé fagnaðarefni fyrir marga. „Þjónusta okkar við byggðir landsins er að sama skapi efld verulega, enda bjóðum við nú vikulega komu skips á Bíldudal, Sauðárkrók, Akureyri og Reyðarfjörð.“ Þá segir hann nýja kerfið betur í stakk búið til að takast á við frávik sem kunna að verða vegna veðurs.