Málið gegn Hval fellt niður
Setja bókamerki
Mál Verkalýðsfélags Akraness (VLFA) gegn Hval hf. fyrir Félagsdómi var fellt niður að kröfu VLFA sem upphaflega stefndi Hval hf. Málskostnaður féll niður. Þetta kemur fram í úrskurði Félagsdóms frá 8. október.
„Við það að fara í alla þessa vegferð og endalausar ávirðingar í fjölmiðlum og draga svo málið til baka þá hlaupa þeir burtu. Formaðurinn er fyrir mér eins og físibelgur sem blæs sig út og svo tæmist loftið úr honum og þá hleypur hann burt með skottið á milli lappanna,“ sagði Kristján Loftsson, framkvæmdastjóri Hvals hf.
Málið reis í framhaldi af deilum verkalýðsfélagsins við Hval á liðnu sumri. Verkalýðsfélagið stefndi Hval og krafðist þess í fyrsta lagi að viðurkennt yrði að gildandi kjarasamningur SGS og SA gilti um kjör starfsmanna við hvalvinnslu 2018. Í öðru lagi var þess krafist að viðurkennt yrði að við störf hjá Hval hefði ekkert stéttarfélag eða félagsmenn annars stéttarfélags forgang til starfa umfram Verkalýðsfélag Akraness og félagsmenn þess. Einnig var þess krafist að viðurkennt yrði að Hvalur hefði í aðdraganda og við upphaf hvalvertíðar 2018 brotið gegn lögum um stéttarfélög og vinnudeilur með því að starfsmenn ættu aðeins samskipti við Stéttarfélag Vesturlands (SV) og með því að lýsa því yfir að Hvalur myndi einungis greiða stéttarfélagsgjöld til SV og setja það skilyrði að starfsmenn Hvals skyldu ekki vera félagsmenn í verkalýðsfélaginu.
Þá var þess krafist að Hvalur yrði sektaður fyrir lögbrot. Einnig að viðurkennd yrði skaðabótaskylda Hvals gagnvart verkalýðsfélaginu vegna afskipta af stéttarfélagsaðild starfsmanna og að Hval yrði gert að greiða verkalýðsfélaginu málskostnað.
Ljóslega engin viðurkenning á málatilbúnaði VLFA
Hvalur hf. segir í yfirlýsingu að upphaflegar dómkröfur Verkalýðsfélags Akraness hafi lotið annars vegar að því að „enginn sérkjarasamningur væri í gildi á milli Hvals og Stéttarfélags Vesturlands (SV) varðandi störf í Hvalfirði, þ.ám. forgangsréttur félagsmanna SV til vinnu, heldur lytu ráðningarsamböndin almennum kjarasamningi SGS og SA. Hvalur lýsti því yfir í greinargerð sinni fyrir dómi að enginn ágreiningur væri um þetta atriði að fenginni formlegri afstöðu SV til þess að enginn sérkjarasamningur við SV væri í gildi“.
Hvalur segir að breytt afstaða sín hafi helgast af afstöðu SV en ekki málatilbúnaði verkalýðsfélagsins. Þá hafi verkalýðsfélagið leitað viðurkenningar á því að Hvalur hefði sett það sem skilyrði við ráðningu að starfsmenn væru ekki í verkalýðsfélaginu og að Hvalur yrði dæmdur til refsingar og skaðabóta vegna þess. Því hafi Hvalur hafnað alfarið.
Undir rekstri málsins hafi verkalýðsfélagið krafist niðurfellingar málsins og þannig heykst á því að fá efnisdóm um kröfur sínar, aðrar en málskostnað. Þá segir Hvalur að í úrskurði Félagsdóms felist ljóslega engin viðurkenning á málatilbúnaði Verkalýðsfélags Akraness varðandi meint afskipti Hvals af stéttarfélagsaðild starfsmanna.
VLFA enn í málaferlum
„Það er ekki óeðlilegt að biðja um að mál sé fellt niður þegar búið er að ganga að öllum okkar kröfum,“ sagði Vilhjálmur Birgisson, formaður Verkalýðsfélags Akraness (VLFA).
„Við gátum ekki haldið áfram þegar búið var að uppfylla þrjár helstu kröfur okkar. Starfsmönnum Hvals var heimilað að vera í Verkalýðsfélagi Akraness. Það var viðurkennt að kjarasamningur Starfsgreinasambandsins gilti fyrir þessi störf og Hvalur skilaði síðan félagsgjöldum af félagsmönnum sem vildu vera í Verkalýðsfélagi Akraness. Þá stóð eftir ein krafa sem var um skaðabætur vegna þess tjóns sem félagið hafði orðið fyrir. Það var ekki hægt að sýna fram á skaða því það var búið að uppfylla allt. Þetta var fullnaðarsigur í málinu en hafðist ekki fyrr en búið var að vísa málinu til félagsdóms.“
Vilhjálmur sagði að VLFA væri enn í málferlum við Hval hf. og ræki sjö mál fyrir Héraðsdómi Vesturlands til staðfestingar á hæstaréttardómi sem féll VLFA í vil á liðnu sumri.
Eðlilegt að fjör sé að færast í leikinn
Vinna hafin við gerð nýs varnargarðs
Isavia hlaut ekki meðbyr í Hæstarétti
Segja ekkert komið fram sem sanni sök flugmannsins
Bjarni: Of snemmt að ræða lagasetningu
„Greinlega allt á réttri leið“
Varðhald rennur út á morgun
Yfir 20 þúsund símtöl verða að engu