Stóð alltaf til að finna leiðir til að fjármagna Hafró
Setja bókamerki
„Menn fundu leiðir til þess að fjármagna starfsemi Hafrannsóknastofnunar á þann máta að hún stæði á svipuðum slóðum og hún gerði í störfum sínum á árinu 2018,“ segir Kristján Þór Júlíusson, sjávarútvegs- og landbúnaðarráðherra, í samtali við mbl.is.
Í tilkynningu frá Hafrannsóknastofnun fyrr í kvöld kom fram að dregið hefur verið úr fyrirhuguðum niðurskurði hjá Hafrannsóknarstofnun í kjölfar stífra fundarhalda sjávarútvegsráðherra með starfsfólki atvinnuvega- og nýsköpunarráðuneytis.
Sigurður Guðjónsson, forstjóri Hafrannsóknastofnunar, sagði í samtali við mbl.is í gær að allt að tuttugu starfsmönnum yrði sagt upp fyrir lok mánaðar og að rannsóknaskipi stofnunarinnar, Bjarna Sæmundssyni, yrði lagt fyrir fullt og allt.
„Ég hafði aldrei heyrt á það minnst fyrr en í fjölmiðlum að menn væru að ræða það að segja upp tuttugu manns og leggja einu skipi,“ segir Kristján í samtali við mbl.is. Hann segir að alltaf hafi staðið til að finna leiðir til að bæta úr þeim breytingum sem urðu á fjármögnun Hafrannsóknastofnunar.
Bjartsýnn á framhaldið
„Við höfum setið yfir þessu síðustu daga og vikur og afrakstur þeirrar vinnu liggur nú fyrir í þessari niðurstöðu. Okkar bíður þó það verkefni að lagfæra hvernig stofnunin er fjármögnuð þannig að það sé ekki verið að fjármagna varanleg verkefni með tekjustofnum sem fara upp eða niður milli ára. Það er brýnt í mínum huga,“ bætir Kristján við.
Hann segir að hagræðingarkrafa sem gerð er á Hafrannsóknastofnun sé sú sama og gerð er á aðrar stofnanir ríkisins og er hann bjartsýnn að Hafrannsóknastofnun og aðrar stofnanir geti unnið innan þess fjárhagsramma.
„Getum haldið Bjarna Sæmundssyni“
„Þessi niðurstaða sem nú er komin leiðir til þess að við getum haldið Bjarna Sæmundssyni og haldið í okkar ágæta fólk. Það er ljóst að við þurfum að taka hagræðingarkröfum eins og aðrar ríkisstofnanir og síðan að afla tekna. Í haust munum við leigja frá okkur Árna Friðriksson, þannig það brúar bilið í ár,“ sagði Sigurður Guðjónsson, forstjóri Hafrannsóknastofnunar í kvöldfréttum RÚV fyrr í kvöld. Hann sagði jafnframt aðspurður að Hafrannsóknastofnun kæmist þokkalega frá hagræðingunni.
Samkvæmt heimildum RÚV er unnið að lausn sem miðar að því að stofnunin fái framlag úr ríkissjóði í stað 140 milljóna króna sem áttu að koma úr Verkefnasjóði sjávarútvegsins.
Frambjóðendur skila inn listum í Hörpu
Mál hjúkrunarfræðingsins fer aftur fyrir héraðsdóm
Norskur lögreglumaður dæmdur
Nemendur í HÍ reistu tjaldbúðir án leyfis
Gígbarmurinn hækkað frá því í gær
Breytingar á skipulagi fréttadeildar RÚV
Strand skemmtiferðaskips kallar á erlenda aðstoð