Strandveiðibátum fjölgar en veiðin misjöfn

400 bátar eru nú komnir með heimild til strandveiða hringinn í kringum landið, og hefur þeim fjölgað um 10% miðað við sama tíma á síðasta ári. Af þessum bátum hafa 328 hafið veiðar og landað hátt í 500 tonnum.

Þetta kemur fram á vef Landssambands smábátaeigenda. Segir þar að nokkrar sveiflur séu í veiðum á milli svæða miðað við upphaf strandveiða á síðasta ári. Þannig höfðu bátar á svæði D, það er frá Hornafirði að Borgarbyggð, bætt verulega við sig þegar staðan var tekin út í gær.

Afli þar var þá kominn í 150 tonn miðað við 82 tonn á sama tíma í fyrra. Aukningin er sögð skýrast af fleiri róðrum, sem endurspegli tíðarfar á þessum tíma.

Af sömu ástæðum séu aflatölur á svæði A, það er frá Eyja- og Miklaholtshreppi að Súðavíkurhreppur, mun lægri nú en í fyrra.

Sjá töflu á vef sambandsins

• Blogga um frétt