Aflamarki í makríl hefur verið úthlutað

Leyfilegur heildarafli í makríl á þessu ári nemur samtals 140.240 tonnum og hefur 80% aflamarksins nú verið úthlutað til bráðabirgða.

Samkvæmt reglugerð sem atvinnuvega- og nýsköpunarráðuneytið hefur gefið út verða til úthlutunar á grundvelli hlutdeilda samtals 127.307 tonn. 7.433 tonn verða boðin á skiptimarkaði og svo verða 4.000 tonn boðin handfærabátum gegn gjaldi. Loks verða 1.500 tonn framseld til rússneskra skipa samkvæmt tvíhliða samningi ríkjanna.

Fiskistofa hefur í dag úthlutað hlutdeildum í makríl í samræmi við þetta, að því er fram kemur í tilkynningu frá stofnuninni. Segir í henni að stofnunin muni eigi síðar en 10. ágúst senda útgerðum skipa tilkynningar um endanlega aflahlutdeild skipa þeirra í makríl. Frestur til að koma athugasemdum á framfæri við stofnunina er til 10. júlí.

Vilhelm Þorsteinsson, skip Samherja. mbl.is/Þorgeir Baldursson.

Vilhelm, Víkingur, Huginn og Aðalsteinn Jónsson

Samkvæmt lauslegri skoðun 200 mílna virðist sem Vilhelm Þorsteinsson EA, skip Samherja, fái mest úthlutað eða rúm 7,3% af úthlutuðu aflamarki. Þar á eftir er Víkingur AK, skip HB Granda, með rúmlega 7% hlutdeild. Huginn VE, sem Huginn ehf. gerir út, fær tæplega 6,4% hlutdeild, og Aðalsteinn Jónsson SU, skip Eskju, fær rúmlega 6,2% hlutdeild.

Ekki heimilt að millifæra

Hér má sjá aflastöðulista þar sem fram kemur úthlutunin á hvert skip ásamt flutningi á ónýttum aflaheimildum úr pottakerfi síðasta árs, en þær falla undir dálkinn „sérstakar úthlutanir“.

Fiskistofa vekur athygli á að ekki er heimilt að millifæra hlutdeildir eða aflamark í makríl fyrr en endanleg úthlutun hefur farið fram.

Listi yfir skiptingu hlutdeilda í makríl og skiptingu skipa í  A- og B-flokk.

Aflahlutdeild í makríl er sögð skiptast í tvo flokka, A- og B-flokk. Í A-flokki er hlutdeild úthlutað á grundvelli veiðireynslu með öðrum veiðar­færum en línu og handfærum. Í B-flokki er hlutdeild úthlutað á grundvelli veiðireynslu með línu og handfærum. 

Sjá nánar á vef Fiskistofu.

• Blogga um frétt