Makríllinn stærri og feitari en í fyrra

Makrílveiðar hófust í síðustu viku og hafa þær farið vel af stað. Friðrik Mar Guðmundsson, framkvæmdastjóri Loðnuvinnslunnar, segir að meira hafi veiðst en á sama tíma í fyrra. „Ef allt gengur að óskum þá ættum við að ná um 2.500 tonnum fyrir mánaðamót samanborið við sirka 1.500 í fyrra,“ segir hann og bætir við að makríllinn sé bæði feitari og stærri en undanfarin ár.

Hoffell, skip Loðnuvinnslunnar, er nú í sínum þriðja túr austan af Höfn í Hornafirði. Hófust veiðar við Vestmannaeyjar, en í fyrra neyddust menn til að halda mun vestar á veiðarnar, allt að miðlínu milli Íslands og Grænlands.

Makrílstofn í landhelginni hefur verið breytilegur milli ára. Veiði náði hámarki árið 2014 þegar 170 þúsund tonn veiddust, en í fyrra gekk veiði nokkuð brösuglega og veiddust þá 135 þúsund. Kvóti ársins er 140 þúsund tonn.

Gunnþór Ingvarsson, framkvæmdastjóri Síldarvinnslunnar, tekur í svipaðan streng. Veiði fari vel af stað, en hann segir þó erfitt að bera hana saman við síðasta ár þar sem svo stutt er liðið á vertíðina.

Veiði gekk nokkuð brösuglega í fyrrasumar, hófst seint og aðeins veiddust 135 þúsund tonn sem er nokkur samdráttur frá árinu 2014, þegar afli fór hæst í 170 þúsund tonn. Vonir standa til að veiðin gangi betur í ár

• Blogga um frétt