„Það er búin að vera mokveiði af síld þarna fyrir austan alveg rosalega stór hol. Það er búin að vera ágætis veiði þar, jafnvel of mikið af því góða,“ segir Ingimundur Ingimundarson, útgerðarstjóri uppsjávarskipa hjá Brimi, í samtali við 200 mílur. Hann segir að Víkingur AK-100 hafi verið að landa um eitt þúsund tonnum í gær. „Þetta gengur vel og ekki yfir neinu að kvarta.“
Það er ekki bara hjá Brimi sem mokast inn síldin. Á vef Síldarvinnslunnar segir að skipin hafi verið að fá stór hol eftir að hafa dregið stutt. Til að mynda fékk Beitir NK 1.320 tonn eftir að hafa dregið í 40 mínútur á sunnudag.
Víkingur AK á siglingu.
Ljósmynd/Brim hf.
Þá lét Börkur NK úr höfn í dag en beið með að hefja veiðar þar sem þurfti að stýra veiðum í samræmi við afkastagetu fiskiðjuvers Síldarvinnslunnar, að sögn Hálfdanar Hálfdanarsonar skipstjóra. Var verið að vinna 1.200 tonn af síld úr Margréti EA þegar Börkur NK lagði úr höfn.
„Þetta eru stórir farmar og það tekur 30-36 klukkustundir að vinna hvern farm. Það hefur yfirleitt verið auðvelt að ná í síldina að undanförnu. Lóðningarnar hafa verið sterkar og þær hlaupa saman annað slagið. Nú líður væntanlega að því að síldin fari að ganga frá landinu og þá þarf að elta hana austur í haf. Síldin sem fengist hefur hér austur af landinu að undanförnu er stór og yfir 380 grömm að þyngd að meðaltali. Þetta er ábyggilega úrvalssíld til vinnslu. Heyrst hefur að færeysk skip séu að veiða síld hér norður í hafinu sem er enn stærri, eða um 450 grömm. Það virðist vera mikið af síld á ferðinni hér við land núna,“ er haft eftir Hálfdani á vef Síldarvinnslunnar.