Útflutningur sjávarafurða frá Bretlandi til Evrópusambandsríkja gæti stöðvast innan 48 tíma í kjölfar samningslausrar útgöngu landsins úr Evrópusambandinu, að því er fram kom á fundi sérfræðinga og hagsmunaaðila með þingnefnd breska þingsins í gær.

Fram kemur í umfjöllun Guardian að vandinn tengist meðal annars skorti á vottunaraðilum sem geta tryggt að breskar sjávarafurðir geti uppfyllt innflutningskröfur sambandsins.

Var þingnefndinni bent á að um 50 vörubílar sem aka með skelfisk til Evrópusambandsins frá Bretlandi munu þurfa að hafa fjórar mismunandi vottanir til þess að flutningur geti átt sér stað ef Bretland yfirgefur sambandið án útgöngusamnings. Meðal annars upprunavottun og heilsufarsvottun. Þá gætu bílstjórar einnig þurft að búa yfir starfsleyfisbréfum.

Talsverður undirbúningur hefur verið í Calais vegna Brexit. AFP

Tafir vegna þessa gætu myndast, en um 10 þúsund vörubílar ferðast frá Dover í Bretlandi til Calais í Frakklandi á hverjum degi. Afleiðingar tafa gætu þannig haft skaðleg áhrif á flutning á fersku sjávarfangi. Þingmönnum var einnig kynntur skortur á starfsfólki heilbrigðiseftirlits og dýralæknum til þess að framkvæma vottanirnar.

„Öll ferskvara er er háð tíma. Lifandi skelfiskur er mjög háður tíma. Bílfarmar af deyjandi eða dauðum humar eru ekki góðar fréttir,“ sagði David Jarrad, framkvæmdastjóri hagsmunasamtaka breskra skelfiskútgerða (Shellfish Association of Great Britain).

Terri Portmann, ráðgjafi í sjávarútvegsmálum, gagnrýndi sérstaklega ríkisstjórn Boris Johnsons fyrir að hafa ekki undirbúið með nægilegum hætti viðbrögð við samninglausri útgöngu Bretlands úr Evrópusambandinu.

Tengdar fréttir

Brexit

Nigel Farage gefur kost á sér og leiðir flokk

• Verði auðveldara að fara til og frá Bretlandi
• Fríverslunarsamningurinn formlega genginn í gildi
• Harma hve illa Bretum hefur tekist að semja
• Fimm mál sem leiddu til fallsins

» Fleiri tengdar fréttir

• Blogga um frétt