Eimskip selur þrjú frystiskip í Noregi

Eimskip hefur komist að samkomulagi um sölu á þremur frystiflutningsskipum félagsins í Noregi fyrir 12 milljónir Bandaríkjadala. Skipin sem bera nöfnin Langfoss, Stigfoss og Vidfoss eru 30 ára gömul og hafa verið í rekstri félagsins í Noregi í um 20 ár og í eigu Eimskips síðustu 8 ár. Þetta kemur fram í tilkynningu frá fyrirtækinu. 

Í tilkynningunni segir enn fremur að Eimskip hafi verið með sex frystiskip í rekstri og eftir söluna verði þau fjögur, þar af þrjú í eigu Eimskips. Samkvæmt upplýsingum frá félaginu mun fækkun skipa ekki hafa áhrif á þjónustu í áætlunarsiglingum í Noregi. Þess í stað verður dregið úr flutningsgetu í svokallaðri „spot-þjónustu“.

Sala á skipunum er liður í áframhaldandi hagræðingaraðgerðum Eimskips í Noregi, en líkt og fram hefur komið í fjárfestakynningum félagsins á árinu stefnir félagið á einföldun í rekstri og aukna arðsemi. Kaupin á skipunum eru háð hefðbundnum fyrirvörum um kaup og sölu skipa. 

• Blogga um frétt