„Forskot Íslands gæti breyst á komandi árum“
Setja bókamerki
„Búast má við mun harðari samkeppni frá Rússlandi á alþjóðlegum fiskmarkaði á næstu árum,“ segir Heiðrún Lind Marteinsdóttir, framkvæmdastjóri Samtaka fyrirtækja í sjávarútvegi (SFS), í pistli á vef samtakanna. Bendir hún á að hin aukna samkeppni er meðal annars vegna útflutningi hátæknibúnaðar frá Íslandi.
„Því er vert fyrir þá, sem telja að uppstokkunar sé þörf í íslenskum sjávarútvegi, að hugleiða hvernig mæta á samkeppninni,“ segir Heiðrún Lind. „Verði dregið úr hagkvæmni fiskveiða við Ísland verður það ekki bara tap fyrirtækjanna, heldur allra tap. Sumum finnst sjálfsagt að taka þessa áhættu, en þeir hinir sömu verða þá að taka það að sér að tryggja stöðu Íslands á alþjóðlegum markaði fyrir sjávarafurðir. Án fótfestu á alþjóðlegum markaði er íslenskur sjávarútvegur ekki fugl og enn síður fiskur.“
Tilefni orða framkvæmdastjórans er sú mikla fjárfesting sem hefur átt sér stað í fiskvinnlu og fiskiflota í Rússlandi á undanförnum misserum. Hún segir Íslendinga standa framar Rússum í vinnslu og veiðum, en „það gæti hæglega breyst á komandi árum. Íslendingar eru ekki stórir í alþjóðlegu samhengi þegar kemur að sölu sjávarafurða. Reyndar svo litlir að íslensk fyrirtæki verða sífellt að þróa og fjárfesta í nýjustu tækni og búnaði til þess að standast samkeppni.“
Þá segir Heiðrún Lind mörg innlend tækni- og iðnfyrirtæki hafa náð fótfestu vegna fjárfestinga sjávarútvegsfyrirtækja og að þau séu nú fær um að flytja út tæknilausnir fyrir tugi milljarða á ári, meðal annars til Rússlands.
„Nema hvað Rússar stefna á sömu markaði og Íslendingar. Samkeppnin frá rússneskum sjávarútvegi er með öðrum orðum að aukast, og það með hjálp okkar Íslendinga. Rússar hafa sérstaklega leitað í smiðju íslenskra fyrirtækja þegar kemur að endurnýjun fiskvinnslu og skipa. Nú þegar eru Rússar byrjaðir að smíða, eða hyggjast smíða, 43 skip og 23 fiskvinnslur. Stærstu skipin eru yfir 100 metrar á lengd. Umfang fjárfestinga er hreint ótrúlegt og það er ekki síst að þakka ýmiss konar efnahagslegum hvötum sem rússnesk stjórnvöld hafa innleitt til að styðja við þessa vegferð,“ segir framkvæmdastjórinn.
Bergnuminn í Hvalfirði
Gígbarmurinn hækkað frá því í gær
Mál hjúkrunarfræðingsins fer aftur fyrir héraðsdóm
Hvorki sést áður hér á landi né annars staðar
Strand skemmtiferðaskips kallar á erlenda aðstoð
Vonast til að tjaldbúðir við HÍ standi áfram