„Veðrið truflaði okkur verulega framan af“

„Veðrið gerði okkur erfitt fyrir fyrstu tvær vikurnar. Vegna brælunnar urðum við að veiða fyrir austan og norðan land en að því kom að við gátum fært okkur suður fyrir,“ er haft eftir Bjarna Ólaf Hjálmarsson, skipstjóra Blængs NK, á vef Síldarvinnslunnar um nýafstaðinn þriggja vikna túr.

Blængur kom til hafnar á Neskaupsstað aðfaranótt mánudags með rúmlega 540 tonn að verðmæti 153 milljónum króna. Aflinn var blandaður en mest af gulllaxi, karfa og ufsa.

„Fyrir sunnan landið veiddum við frá Lónsdýpinu og vestur í Skerjadýpi og þar var ágætis kropp í gulllaxi, karfa og ufsa. Við verðum að vera ágætlega sáttir við niðurstöðu túrsins því veðrið truflaði okkur verulega framan af,“ segir Bjarni Ólafur. Gert er ráð fyrir að Blængur haldi til veiða á fimmtudag.

• Blogga um frétt