Nýr Vilhelm Þorsteinsson EA var sjósettur af skipasmíðastöðinni Karstensens Skibsværft í Gdynia í Póllandi 12. júní síðastliðinn og er búist við að þessi nýsmíði Samherja hf. verði lokið fyrir jól, að því er segir í færslu á vef fyrirtækisins. „Um er að ræða nýsmíði sem við höfum beðið eftir með töluverðri eftirvæntingu,“ er haft eftir Kristjáni Vilhelmssyni, framkvæmdastjóra útgerðarsviðs Samherja.
Fram kemur að skrokkur skipsins hafi verið tilbúinn til sjósetningar fyrir átta vikum en vegna kórónuveirufaraldursins var ekki að ráðist í hana fyrr en í þessum mánuði.
Nýr Vilhelm Þorsteinsson EA skipasmíðastöðin í Gdynia í Póllandi
Ljósmynd/Samherji
Hinn nýi Vilhelm Þorsteinsson hefur burðargetu sem nemur 3.000 tonnum af kældum afurðum og mun taka við af núverandi Vilhelmi Þorsteinssyni EA 11, en hann kom nýr til landsins fyrir tveimur áratugum.
„Skrifað var undir samninga vegna smíði skipsins hinn 4. september 2018 en þann dag hefðu tvíburarnir Baldvin og Vilhelm Þorsteinssynir orðið 90 ára. Búnaður skipsins verður einstaklega góður, bæði hvað varðar veiðarnar sjálfar og meðferð aflans en einnig hvað varðar vinnuaðstöðu og vistarverur áhafnar,“ segir Kristján.
Stýrihúsinu komið fyrir.
Ljósmynd/Samherji
Nýr Vilhelm Þorsteinsson EA við bryggju.
Ljósmynd/Samherji
Þegar sjósetning fer fram er hjólabúnaður settur undir skrokkinn og hann færður út á flotpramma sem er síðan dreginn frá bryggjunni og út á nægilegt dýpi. Sjó er þá dælt í tanka prammans þannig að hann fer á kaf nægilega mikið til þess að skipið fljóti, segir á vef Samherja.
Þá segir að í byrjun síðustu viku hafi verið komið fyrir tveimur aðalvélum skipsins, stýrishúsinu með einni íbúðarhæð undir og radarmastri. Unnið verður áfram að skipinu í nokkra daga áður en það er dregið til Skagen í Danmörku og smíðinni lokið.