Spöruðu 56,5 milljón lítra af olíu

Rafmagn uppfyllir nú 83% af orkuþörf fiskmjölsverksmiðja hér á landi og stefnt er að enn hærra hlutfalli á næstu árum. 

Hlutfall rafmagns var 75% fyrir átak Landsvirkjunar og Félags íslenskra fiskmjölsframleiðandi sem hófst árið 2017. 

Hlutfall rafmagns í orkukaupum fiskmjölsverksmiðja hefur þannig farið sívaxandi og hefur á tímabilinu 2017 til 2019 sparað brennslu á 56,5 milljón lítrum af olíu eftir því sem fram kemur í tilkynningu. 

Við þetta minnkaði kolefnislosun fiskmjölsverksmiðjanna um 168 þúsund tonn, en það jafngildir akstri 36.295 fólksbíla á einu ári. 

Fiskmjölsframleiðendur hafa lengi stuðst við bæði olíu og rafmagn í framleiðslu sinni og keypt svokallað skerðanlegt rafmagn. Framboð á slíku rafmagni er hins vegar takmarkað og því hafa framleiðendur fiskmjöls þurft að reiða sig einnig á olíu, með tilheyrandi mengun. 

Árið 2017 lýstu Landsvirkjun og FÍF (Félag íslenskra fiskmjölsframleiðenda) því yfir að orkufyrirtækið myndi auka framboð á skerðanlegri raforku eftir föngum, en olía yrði áfram varaaflgjafi fiskmjölsframleiðenda. Þá bauð Landsvirkjun smásölum á raforkumarkaði að semja til lengri tíma en áður vegna áframsölu til fiskmjölsframleiðenda. Það varð fiskmjölsverksmiðjum hvati til að ráðast í þær fjárfestingar sem þurfti til að keyra framleiðsluna á rafmagni.

Vel hefur gengið að fylgja þessu eftir og hafa Landsvirkjun og FÍF því aftur lýst yfir að samskonar fyrirkomulag gildi til næstu þriggja ára. 

• Blogga um frétt