Fyrsta veiðiferðin í mánuð gekk vel

Ísfisktogarinn Gullver NS kom til Seyðisfjarðar í morgun að lokinni fyrstu veiðiferð eftir mánaðarlangt sumarfrí.

Afli skipsins er rúm 97 tonn og er hann blandaður. Frystihúsið á Seyðisfirði mun hefja vinnslu á föstudagsmorgun en það hefur verið lokað vegna sumarleyfa allan júlímánuð, að því er segir á vefsíðu Síldarvinnslunnar.

Þórhallur Jónsson skipstjóri segir gott að komast á sjóinn á ný, í samtali við vefsíðuna. „Það var töluvert unnið í skipinu á meðan á fríinu stóð og mikið málað og snyrt. Þá var sett krapavél í skipið og var hún notuð í fyrsta sinn í þessum túr,“ segir hann og bætir svo við: „Í þessum túr veiddum við á Stokksnesgrunni og í Hornafjarðardýpinu og enduðum svo túrinn úti á Fæti. Það gekk bara vel að fiska,“ segir hann.  

Gullver mun halda á ný til veiða klukkan átta í kvöld.

• Blogga um frétt