Enginn fari óskimaður um borð
Setja bókamerki
„Þetta er hrikalegt bara,“ segir Gunnar Tómasson, framkvæmdastjóri útgerðarfélagsins Þorbjarnar hf. sem gerir út línubátinn Valdimar GK, um kórónuveirusmitin fjórtán sem komu upp þar um borð.
„Þetta getur blossað upp hér og þar en það er verst þegar þetta blossar upp í áhöfn. Þarna er samfélagið svo þröngt og náið að það kemst nánast enginn undan því að smitast, ef svona smit kemur þar upp á annað borð,“ segir Gunnar.
Tveir í sóttkví á Djúpavogi
Spurður út í líðan skipverjanna fjórtán sem smituðust segir hann að veiran leggist misjafnlega þungt á þá. Sumum líður illa en einhverjir eru ekki enn farnir að finna fyrir einkennum.
Einhverjir eru í sóttkví eftir að hafa átt samskipti við skipverjana, meðal annars tveir austur á Djúpavogi. Að sögn Gunnars eru skipverjarnir alls staðar að af landinu, meðal annars frá Hafnarfirði, Reykjavík og Akranesi. Aðeins einn til tveir eru úr Grindavík þaðan sem báturinn gerður út.
Skipstjórinn einangraði sig frá áhöfninni
Þegar Gunnar er beðinn að rekja það sem gerðist segir hann að á fimmtudaginn í síðustu viku hafi skipverji um borð veikst. Þegar farið var að kanna málið kom í ljós að annar hafði veikst sem hafði verið með skipverjunum í síðasta túr en sá hafði farið heim til sín í frí. Tekið var strax af honum sýni og reyndist það jákvætt. Fyrir vikið var gengið út frá því að sá sem var veikur um borð væri líka smitaður af veirunni. Eftir þetta fjölgaði þeim sem voru veikir um borð og voru þeir orðnir sex til sjö þegar báturinn kom til hafnar.
Spurður út í starfsemina um borð í bátnum vegna veikindanna segir hann að veiku mennirnir hafi verið inni í sínum klefum. Skipstjórinn og stýrimaðurinn einangruðu sig frá áhöfninni til að skipið væri áfram stjórntækt. Á þessum tímapunkti vissu menn ekki hverjir höfðu sýkst um borð. „Þetta gekk mjög vel allt saman. Við vorum fegnir því að þeim tókst að komast klakklaust í land.“
Það var svo ekki fyrr en í gær sem ljóst var að allir um borð höfðu smitast, þar á meðal skipstjórinn og stýrimaðurinn.
Vilja breyta vinnulaginu
Áður en smitin blossuðu upp var búið að gera ráð fyrir því að báturinn færi í slipp þessa vikuna. Þó er ljóst að einhvern tíma í viðbót tekur að fá afla af skipinu, mögulega þrjár til fjórar vikur, útskýrir Gunnar, sem bætir við að menn komist misjafnlega undan veirunni, sem feli einnig í sér óvissu fyrir útgerðina.
Spurður hvort það komi til greina að skima menn framvegis áður en þeir fara um borð segir hann að það hafi verið gert með frystiskip Þorbjarnar hf. Þjónustan hafi aftur á móti ekki fengist fyrir línubátana því ferðirnar þeirra séu styttri, eða fjórir til fimm dagar, og skiptin á mannskapnum örari. „En við höfum hug á því að reyna að breyta vinnulaginu og að helst fari enginn um borð nema hann fari í skimun. Það er okkar markmið,“ segir Gunnar.
Krefjast stöðvunar framkvæmda
Norskur lögreglumaður dæmdur
Banna mengandi búnað sem leyfður er á Íslandi
Mál hjúkrunarfræðingsins fer aftur fyrir héraðsdóm
Hvorki sést áður hér á landi né annars staðar
Gígbarmurinn hækkað frá því í gær