Risaskipin koma ekki í sumar

Útgerðir farþegaskipa hafa undanfarið verið að afbóka komur skipa sinna til Faxaflóahafna í sumar. Nú er orðið ljóst að ekkert hinna stóru skemmtiferðaskipa, sem taka 2.000 farþega eða fleiri, munu leggja leið sína til Íslands í sumar.

Risaskipin hafa legið meira og minna í höfn eftir að heimsfaraldur kórónuveirunnar kom upp í fyrra. Þau eru að hefja siglingar hvert af öðru á vinsælustu leiðunum, t.d. í Karabíska hafinu og Miðjarðarhafinu. Væntanlega mun skipunum fjölga þegar heimurinn hefur náð betri tökum á faraldrinum.

Í byrjun janúar 2021 voru 198 skipakomur farþegaskipa bókaðar til Faxaflóahafna í sumar með um 217 þúsund farþega. Bókunarstaðan byggði á væntingum skipafélaganna.

„Staðan er hins vegar önnur nú í byrjun júní, áætlaðar eru 99 skipakomur með 71 þúsund farþega,“ segir í frétt á heimasíðu Faxaflóahafna. Þar kemur enn fremur fram að margt geti breyst fram að hausti.